Хапун на Браслаўшчыне, фота Калеснікавай пасля аперацыі. Хроніка пераследу 5 снежня

Рэжым у Беларусі працягвае тэрор супраць грамадзянаў краіны. Сілавікі штодня ладзяць затрыманні і арыштоўваюць людзей за выказванне сваёй думкі. У судах працягваюць агучваць палітычна матываваныя прысуды, а за кратамі катуюць палітвязняў. «Белсат» сабраў вядомыя праваабаронцам факты пераследу і катаванняў 5 снежня.

Telegram-каналы звязаныя з сілавікамі апублікавалі фота з сустрэчы Аляксандра Калеснікава з дачкою. Першапачаткова на фота твар Марыі размылі, але праз некаторы час змясцілі фота, на якім бачна, што Марыя ўсміхаецца.

Фігурантам «справы Атрадаў грамадзянскай самаабароны Беларусі» агучылі вырак, піша праваабарончы цэнтр «Вясна».

Суддзя Менскага абласнога суда Сяргей Епіхаў агучыў наступныя тэрміны: Наталлі Мацвеевай – 14 гадоў калоніі і штраф 400 базавых велічыняў (Br 12 800), Вадзіму Гулевічу – 18 гадоў калоніі і штраф 600 базавых велічыняў (Br 19 200), Кірылу Ашурку – 13 гадоў калоніі і штраф 400 базавых велічыняў (Br 12 800), Аляксею Глотаву – 20 гадоў калоніі і штраф 700 базавых велічыняў (Br 22 400), Дзмітрыю Сасноўскаму – 20 гадоў калоніі і штраф 700 базавых велічыняў (Br 22 400).

КДБ дадаў у спіс «асобаў, якія маюць дачыненне да тэрарыстычнай дзейнасці» 5 асобаў. Гэта палітвязні, сярод якіх Юры Зянковіч, сацыяльная актывістка Анастасія Кухта, працаўнік «EPAM» Андрэй Гарун, Ілля Смалюга і Таццяна Колас.

Байцы ГУБАЗіК затрымалі 35-гадовага распрацоўшчыка Іллю Шакірава. На відэа, якое апублікавалі сілавікі, айцішніка прымушаюць назваць свой вялікі заробак, а таксама «прызнацца» ў тым, што ён пакідаў абразлівыя каментары пра міліцыянтаў.

Краязнаўца з Глыбокага Кастусь Шыталь у сваім Facebook паведаміў пра арышты ў Браслаўскім раёне Віцебскай вобласці, якія адбыліся некалькі дзён таму.

«Забралі сям’ю фермераў Уладзіслава і Юлію Каралёў, а таксама Алёну Селях (тую самую, што гадавала ваўкоў). Жанчын нібыта ўжо адпусцілі», – напісаў Кастусь Шыталь.

Алена Аляксандрава belsat.eu

The post Хапун на Браслаўшчыне, фота Калеснікавай пасля аперацыі. Хроніка пераследу 5 снежня appeared first on belsat.eu.