Расея і Беларусь патрапілі пад агонь крытыкі на паседжанні Рады міністраў АБСЕ

Паседжанне Рады міністраў АБСЕ 1-2 снежня праходзіць у польскім горадзе Лодзь. Сёння выступілі прадстаўнікі Беларусі, ЗША, Польшчы, Украіны, якія ў сваіх прамовах абмяняліся ўзаемнымі заўвагамі. Прамовы трансляваліся ў жывым эфіры. 

Выступ памерлага міністра замежных справаў Уладзіміра Макея ў Лодзі зачытаў прадстаўнік Беларусі пры АБСЕ ў Вене Андрэй Дапкюнас. «Сёння Еўропа ў агні. Гэты пажар пачаўся не сёлета ў лютым. Ён тлеў дзесяцігоддзямі. Усялякае грэбаванне інтарэсамі і меркаваннем свайго суразмоўцы, усякая спроба ўмацаваць сваю бяспеку і дабрабыт за кошт бяспекі і дабрабыту іншых, усякая напышлівая праява пачуцця ўласнага права караць і мілаваць – усё гэта падарвала традыцыю раўнапраўнага ўзаемадзеяння ў Еўропе. Гэта разʼела сам дух Хельсінкі», – гаворыцца ў звароце афіцыйнага Менску.

У выступе беларускага МЗС сітуацыя ў Еўропе параўноўвалася з пажарам, які трэба тушыць, а не прызначаць вінаватых у ім, а таксама змяшчаліся заклікі прымаць мір ва ўсёй яго разнастайнасці і весці дыялог.

Адразачку пасля Дапкюнаса выступала намеснік дзяржсакратара ЗША Вікторыя Нуланд, якая заклікала Беларусь спыніць падтрымку расейскай агрэсіі супраць Украіны. Нуланд адрэагавала на выступленне прадстаўніка лукашэнкаўскай дыпламатыі, назваўшы просты шлях патушыць пажар у Еўропе.

«Пры ўсёй павазе да беларускага калегі, ёсць вельмі просты шлях спыніць гэты пажар, і спыніць яго сёння. Для Расеі – гэта спыніць сваю заганную вайну супраць Украіны, яе ваенныя атакі, цяпер яшчэ і заганныя атакі супраць грамадзянскіх, а для Беларусі – спыніцца быць даступнай платформай для гэтых нападаў», – сказала Нуланд.

У сваю чаргу, кіраўнік польскай дыпламатыі Збігнеў Раў у сваё прамове адзначыў, што Расея нясе адказнасць за параліч працы АБСЕ. Польскі міністр замежных справаў, які з’яўляецца сёлетнім старшынём АБСЕ, назваў «скандальнымі» абвінавачванні Расеі ў тым, што «улады ў Варшаве штурхаюць АБСЕ ў прорву».

У гэтым кантэксце Збігнеў Раў распавёў пра сёлетнюю пазіцыю Расеі ў Арганізацыі: «Менавіта Расея ў лютым адмовілася ад адноўленага дыялогу аб еўрапейскай бяспецы. Менавіта Расея ў сакавіку адмовілася падоўжыць мандат спецыяльнай маніторынгавай місіі ва Украіне. Нарэшце, менавіта Расея ўвесь год блакавала прыняцце бюджэту АБСЕ».

Удзел у паседжанні міністраў замежных спраў АБСЕ таксама прыняла абраная прэзідэнтка Беларусі Святлана Ціханоўская. Чакаецца, што яна зробіць асобны выступ.

Тым часам, Расея, выкарыстоўваючы прынцып аднагалоснасці, не згодная з выбарам Эстоніі ў якасці краіны, якая ўзначаліць працу АБСЕ ў 2024 годзе. У 2023 годзе Арганізацыю ўзначаліць Паўночная Македонія.

Кіраўніка МЗС Расеі Сяргея Лаўрова, якому Польшча не выдала ўязную візу, у Лодзі няма. Практычна паралельна з самітам у Лодзі расейскі міністр падчас прэс-канферэнцыі ў Маскве абвінаваціў Польшчу ў тым, што яна «выкопвае  магілу» для АБСЕ.

Між тым, прысутны ў Лодзі кіраўнік украінскага МЗС Дзмітрый Кулеба заклікаў Еўразвяз увесці санкцыі супраць расейскай ракетнай прамысловасці. Украінскі міністр таксама адзначыў, што для АБСЕ было б лепш, калі б яна працавала без Расеі.

Пра Раду Міністраў АБСЕ

Антон Тачняк belsat.eu

The post Расея і Беларусь патрапілі пад агонь крытыкі на паседжанні Рады міністраў АБСЕ appeared first on belsat.eu.