Іран скасаваў падраздзяленні паліцыі маральнасці пасля больш як двух месяцаў пратэстаў, выкліканых арыштам Махсы Аміні за нібыта парушэнне строгага жаночага дрэс-коду краіны, паведамляе Al-Arabiya са спасылкай на агенцтва ISNA.
«Паліцыя маральнасці не мае нічога агульнага з судовай сістэмай» і мае быць скасаваная, заявіў генеральны пракурор Ірану Махамад Джафар Мантазеры ўвечары 3 снежня.
Між тым The Guardian піша таксама, што ўлады Ірану вырашылі перагледзець закон, які патрабуе ад жанчын пакрываць галовы:
«І парламент, і судовыя органы працуюць [над пытаннем], ці патрэбныя змены ў законе», – заявіў ужо згаданы Мантазеры.
Пры гэтым невядома, што канкрэтна плануецца змяніць. Вынікі могуць быць «праз тыдзень-два».
Прэзідэнт Ірану Ібрагім Раісі заявіў 3 снежня, што рэспубліканскія і ісламскія асновы Ірану замацаваныя ў канстытуцыі.
«Але ёсць метады выканання канстытуцыі, якія могуць быць гнуткімі», – сказаў ён.
Падчас пратэстаў, якія пачаліся 16 верасня, у Іране забітыя прынамсі 448 пратэстоўцаў. Паведамляецца пра дзясяткі забітых і сярод сілавікоў. Арыштаваныя не менш як 14 тыс. пратэстоўцаў, у тым ліку і дзеці. Арышты працягваюцца і дагэтуль.
Якуб Хруст belsat.eu
The post Пад ціскам пратэстаў Іран скасоўвае паліцыю маральнасці і пераглядае правілы нашэння хіджабаў appeared first on belsat.eu.
#Беларусь
Comments
No comments yet. Be the first to react!