Выданне Politico прызнала Зяленскага самым уплывовым еўрапейцам, а Пуціна – нікчэмнікам го…

Прэзідэнт Украіны Уладзімір Зяленскі стаў самай уплывовай асобай Еўропы ў 2022 годзе паводле выдання Politico. «Ён прымушае Еўропу рабіць тое, што ён хоча», – гаворыцца ў артыкуле, прысвечаным Зяленскаму.

Выданне Politico прызнала Уладзіміра Зяленскага самай уплывовай асобай Еўропы ў 2022 годзе.

«Толькі паглядзіце, як еўрапейскія лідары бягуць у Кіеў, каб сфатаграфавацца з урачыстым 44-гадовым мужчынам у ягонай цяпер ужо культавай аліўкава-зялёнай футболцы. Стоячы побач з ім, палітыкі прагнуць быць заўважанымі. Зяленскі пераканаў астатнюю Еўропу ў тым, што ейная будучыня звязана з Украінай – у гэта мала хто верыў да ўварвання Расеі ў лютым», – гаворыцца ў артыкуле, прысвечаным Зяленскаму.

Politico адзначыла ўмелае выкарыстанне прэзідэнтам Украіны сацыяльных сетак і традыцыйных медыяў. Ён пераканаў еўрапейскіх лідараў і грамадства ў тым, што вайна ва Украіне – гэта таксама вайна Еўропы.

«Гэта дае яму паўнамоцтвы прымусіць Еўропу рабіць тое, што ён хоча. Калі ён хоча зброі, ён яе атрымлівае, нават калі гэта азначае адмену даўняй палітыкі Нямеччыны не прадаваць яе. Калі ён хоча санкцыяў, ён іх атрымлівае», – піша Politico.

Агулам у рэйтынгу самых уплывовых людзей Еўропы 2022 года – 28 палітыкаў. Сярод іх – прэзідэнт Расеі Уладзімір Пуцін, якога выданне абвесціла нікчэмнікам («loser») года.

«Мара Уладзіміра Пуціна аб вялікай Расеі наўрад ці будзе рэалізаваная. Ягонае ўварванне паставіла ягоную краіну ў трэцеразрадны статус, бо яна не магла пераадолець супраціўніка, якога недаацэньвала і якім пагарджала. Іншыя скарацілі б свае страты і адступілі, але ўпартасць Пуціна азначае, што вайна, верагодна, зацягнецца. Няздольнасць Пуціна рэалізаваць сваю мару не азначае, што ён і надалей не будзе кашмарам для сваіх суседзяў», – адзначае Politico.

Раней выданне Financial Times назвала Зяленскага асобай года, а часопіс Time абвесціў персонамі года Зяленскага і «дух Украіны».

Сяргей Крот belsat.eu

The post Выданне Politico прызнала Зяленскага самым уплывовым еўрапейцам, а Пуціна – нікчэмнікам года appeared first on belsat.eu.

#Беларусь