Былая палітзняволеная распавяла, як пачуваецца за кратамі нашая калега, журналістка «Белсату», Кацярына Андрэева. Яе словы перадае праект пра гісторыі палітзняволеных беларусак «Палітвязынка».
«Каці з самага пачатку вельмі цяжка прыйшлося. Яе размеркавалі ў прэс-атрад, праз які прайшлі многія палітзняволеныя дзяўчыны. Цяпер там Соф’я Сапега і яе вельмі жорстка прэсуюць ужо працяглы час. Яе і Паліну Шарэнда-Панасюк выклікалі на «гутарку» да начальніка калоніі.
Каця вельмі чулая. І на яе аказваецца маральны ціск з боку маргінальных асоб. Каці забаранялі нават падыходзіць да палітычных. А калі ўдавалася ёй перакінуцца з намі словамі, было відаць, што яна стараецца з усіх сіл усё гэта выносіць. Каця цяпер вярнулася ў калонію з дадатковым тэрмінам. Яе перавялі ў лепшы атрад, але на фабрыцы ёй забаранілі нават глядзець на палітычных. Каця моцна напакутавалася, але вельмі годна праходзіць гэты шлях, як бы цяжка ёй не было», – перадае былая палітзняволеная.
Журналістку «Белсату» Кацярыну Андрэеву затрымалі 15 лістапада 2020 года падчас стрыму з плошчы Пераменаў. Разам з журналісткаю Дар’яй Чульцовай яе асудзілі да двух гадоў пазбаўлення волі. Сёлета Кацярыне выставілі новае абвінавачанне – у «здрадзе дзяржаве». 13 ліпеня Гомельскі абласны суд прызначыў ёй 8 гадоў і 3 месяцы калоніі агульнага рэжыму паводле сфабрыкаванага абвінавачання.
Суд праходзіў у закрытым рэжыме. На падставе якіх падзеяў паўстала гэтая справа, дасюль невядома. У судзе заявілі, што Кацярыну прызналі віннай «у выдачы дзяржаўных сакрэтаў замежнай арганізацыі, замежнай дзяржаве».
Падтрымаць палітзняволеную журналістку можна паштоўкай ці лістом на адрас: ПК № 4. 246035, г. Гомель, вул. Антошкіна, 3, Кацярына Андрэеўна Бахвалава.
Алена Рувіна belsat.eu
The post «Стараецца з усіх сіл усё гэта выносіць». Як пачуваецца за кратамі журналістка Кацярына Андрэева appeared first on belsat.eu.
#Беларусь
Comments
No comments yet. Be the first to react!