«Перапраўляюцца праз Нёман у гідракасцюмах». Літоўскія памежнікі распавялі пра беларусаў-уцекачоў

Літоўская памежная служба адзначае павелічэнне ліку беларусаў, што ўцякаюць ад пераследу на радзіме. Гэта асобы рознага ўзросту і адукацыі: ад студэнтаў да кіраўнікоў тэатраў, гаворыцца ў рэпартажы тэлерадыёкампаніі LRT з літоўска-беларускай мяжы.

Літоўскія памежнікі заўважылі павелічэнне ліку беларусаў, што хаваюцца ад пераследу на радзіме. «У Літву часцей сталі прыязджаць асобы, якія ўцякаюць ад рэжыму незаконна абранага прэзідэнта Аляксандра Лукашэнкі», – гаворыцца ў рэпартажы тэлерадыёкампаніі LRT з літоўска-беларускай мяжы. Пагранічнікі распавялі, што ў асноўным бягуць тыя, чый прыгавор не набыў моц.

«Праз Нёман перапраўляюцца беларусы ў гідракасцюмах. Калі мы не заўважаем, яны самі шукаюць начальства, шукаюць прытулку. Часцей за ўсё яны паказваюць нейкія дакументы», – кажуць памежнікі.

Адзін уцякач паказаў пастанову суда, у якой гаворыцца, што ён асуджаны за каментары ў інтэрнэце пра Лукашэнку.

Паводле словаў пагранічнікаў, бягуць асобы рознага ўзросту і адукацыі: ад студэнтаў да кіраўнікоў тэатраў. Беларусаў, якім удалося трапіць у Літву, памежнікі перадаюць іншым службам. Пытанне аб прытулку разглядае дэпартамент міграцыі.

«У апошнім выпадку беларус распавёў, што спрабаваў выехаць з сям’ёй у Грузію, але іх не выпусцілі. Нарэшце, як распавёў мужчына, ягоная жонка з дачкой зʼехалі ў Калінінград, а адтуль – у Польшчу. Сам ён спрабуе атрымаць прытулак у Літве», – прывялі падрабязнасці аднаго выпадку ў памежнай службе.

Сяргей Крот belsat.eu

The post «Перапраўляюцца праз Нёман у гідракасцюмах». Літоўскія памежнікі распавялі пра беларусаў-уцекачоў appeared first on belsat.eu.